April 14, 2016

Erdhi Prilli ...


Ngrihi dëshmorë një çikë, të shikoni poshtërsitë!



Ngrihi dëshmorë një çikë,
lule djemtë e nënave,
të shikoni poshtërsitë,
lule djemtë e nënave.

Kudo horra dhe banditë,
lule djemtë e nënave,
i kanë shtuar babëzitë,
lule djemtë e nënave!

Gjaku juaj s’u shpërblye,
lule djemtë e nënave,
se kokëposhtë çdo gjë u kthye,
lule djemtë e nënave!

Komandantit-komisarit,
lule djemtë e nënave,
i prishën vendin e varrit,
lule djemtë e nënave!

Ja prishi në mes të natës,
lule djemtë e nënave,
çetë e Sali Protopapës,
lule djemtë e nënave!

Po s’mbaroi puna këtu,
lule djemtë e nënave,
tani i kanë sytë nga ju,
lule djemtë e nënave!

I kanë sytë mbi varret tuaj,
lule djemtë e nënave,
s’janë ballistë dhe të huaj,
lule djemtë e nënave!

Janë nipat e partizanëve,
lule djemtë e nënave,
zagarë të njëqind sahanëve,
lule djemtë e nënave!

Se ç’e nxinë këtë ditë,
lule djemtë e nënave,
të pabesët socialistë,
lule djemtë e nënave!

Turpin me bukë e kanë ngrënë,
lule djemtë e nënave,
neve mirë na i bënë,
lule djemtë e nënave!

Sa përzumë maskaranë,
lule djemtë e nënave,
nga shiu në breshër ramë,
lule djemtë e nënave!

Sa pa turp na kanë gënjyer,
lule djemtë e nënave,
do vinin për të shërbyer,
lule djemtë e nënave!

Si derrat në llum janë zhgërryer,
lule djemtë e nënave,
duke rrjepur-duke shqyer,
lule djemtë e nënave!

S’jemi vend i tranzicionit,
lule djemtë e nënave,
po mademi i korrupsionit,
lule djemtë e nënave!

Ne me lecka po na hanë,
lule djemtë e nënave,
po me juve ç’dreqin kanë,
lule djemtë e nënave!

Po me juve ç’ka i marri,
lule djemtë e nënave,
që kërkon t’u çkulë nga varri,
lule djemtë e nënave!

Ç’ka me juve-more trima,
lule djemtë e nënave,
e verboftë vetëtima,
lule djemtë e nënave!

Mbi popull po bëjnë dhunë,
lule djemtë e nënave,
në çark e në lak e zunë,
lule djemtë e nënave!

Të pabesë e të pacipë,
lule djemtë e nënave,
Shqipërinë e bënë kripë,
lule djemtë e nënave!

Këtu komandon Demoni,
lule djemtë e nënave,
se s’ju thashë-mos më thoni,
lule djemtë e nënave!

Ngrihi dëshmorë një çikë,
lule djemtë e nënave,
se ky popull rron me frikë,
lule djemtë e nënave!

Frikë kanë nga i marri,
lule djemtë e nënave,
do t’u krrejë dhe ju nga varri,
lule djemtë e nënave!

Jeta s’bëhet më farmak,
lule djemtë e nënave,
unë do t’ju mbroj me gjak,
lule djemtë e nënave!

Të ikin njerëzit e zinj,
lule djemtë e nënave,
sot duhen dëshmorë të rinj,
lule djemtë e nënave!

(Vijon në një ditë tjetër)


Arben Duka/Dita



*  *  *



April 8, 2016

Shqipëria nuk ekziston as si “shprehje gjeografike” (Për Donald Trump)


Ka dy ditë që shqiptarët janë nën ankthin se po u zgjodh Donald Trump president i SHBA-së, marrëdhëniet mes Shqipërisë dhe Partnerit Strategjik, do të cenohen. T’i biem shkurt dhe të sqarojmë dy momente, më saktë tre: 

Së pari, SHBA është me të vërtetë Partner Strategjik i Shqipërisë, pasi kush tjetër do duronte gomarllëqet pa kuptim që prodhon politika e këtij vend? Me siguri, një dikush i fuqishëm, si SHBA, që pikërisht pse është kaq e fuqishme, operon njësoj si Zoti dikur kur krijoi gjindjen: u engledis duke krijuar edhe Shqipërinë.

Së dyti ky përkufizim është në mos i nxituar, është shejtan budalla. Po u zgjodh Donaldi në Shtëpinë e Bardhë dhe paska këtë mendje që na thonë, Donaldi i Rrugës së Elbasanit, nuk ka çfarë të bëjë më, por të mbyllë mandatin duke shijuar dreka apo darka nëpër Shqipëri, siç bënte dikur një ish-ambasador i OSBE-së. Ne i sugjerojmë kole Përmeti dhe ndonjë peshk andej nga Divjaka. Pra presion për Donaldin e këtushëm, por edhe shpresë se kokëçarja e reformës në Drejtësi do të mbyllet me Trump’s victory. Yeah...

Së treti, ka një moment strategjik, madje -  madje psiko-strategjik që e bën shumë të vështitrë për Donald, atë të presidencialeve, që të prekë marrëdhëniet me Shqipërinë. Shikoni hartën e botës sipas Trump. Ku është Shqipëria? Ku? Asgjëkundi. Nuk është madje as si “shprehje gjeografike”. Ne jemi “Gjermania Jugore” dhe Doni i Shtëpisë së Bardhë ka vetë origjinën gjermane. Ndaj, hë hë, këto provokaciet nuk janë serioze. Kjo është harta zyrtare e Trump, por edhe në disa harta të tjera, më pak të besueshme, ne nuk figurojmë fare./ResPublica


*   *   *